2026 жылғы 12–22 мамыр аралығында Қостанай облысында жұмысшы мамандықтарының WorldSkills Kostanay 2026 чемпионаты өтті. Қостанай политехникалық жоғары колледжі аймақтық чемпионатта оқу орнын лайықты таныстырып, командалық есепте бірінші орынды иеленді.

Колледж әсіресе IT-құзыреттері мен цифрлық бағыттар бойынша жоғары нәтиже көрсетті. «Веб-технологиялар», «Заттар интернеті», «Графикалық дизайн», «Бейнемонтаж» және «Мобильді робототехника» құзыреттерінің қатысушылары жеңімпаз атанды. Студенттер бағдарламалау, веб-әзірлеу, цифрлық жүйелермен жұмыс, графика, бейнеөндіріс және робототехника салаларындағы кәсіби дағдыларын сәтті көрсетті.

Сонымен қатар колледж техникалық, өндірістік және сервистік құзыреттер бойынша да жоғары нәтижелерге қол жеткізді. «Өнеркәсіптік автоматика», «CNC станоктарындағы токарлық жұмыстар», «CNC станоктарындағы фрезерлік жұмыстар», «Наубай ісі» және «Астық пен оны қайта өңдеу өнімдерінің сапасын анықтау» құзыреттерінде бірінші орындар иеленілді. Сондай-ақ «Электромонтаж жұмыстары», «Кондитерлік іс» және «Бухгалтерлік есеп» құзыреттерінің қатысушылары жүлделі орындарға ие болды.

Чемпионат қорытындысы бойынша колледж студенттері 11 алтын, 4 күміс және 1 қола медаль, сондай-ақ 4 үздік медальонын жеңіп алып, чемпионаттағы ең үздік нәтижелердің бірін көрсетті.

Жалпы колледж 16 құзырет бойынша қатысып, 32 қатысушы 23 сарапшы-тәлімгердің жетекшілігімен бақ сынады. Сонымен қатар 13 конкурс алаңы колледж базасында ұйымдастырылды. Бұл оқу орнының заманауи материалдық-техникалық базасы мен педагогикалық ұжымның жоғары кәсібилігін тағы бір мәрте дәлелдеді.

WorldSkills Kostanay 2026 чемпионаты Қостанай политехникалық жоғары колледжінің цифрлық технологиялар саласында да, өндірістік бағыттар бойынша да бәсекеге қабілетті жаңа буын мамандарын табысты даярлап жатқанын тағы бір рет көрсетті.