12 маусым күні «Саналы Ұрпақ» ерікті-патриоттық сыбайлас жемқорлыққа қарсы клубының мүшелері «Таза сессия: Сыбайлас жемқорлықсыз болашақ» акциясы аясында колледж студенттері арасында ақпараттық-түсіндіру жұмыстарын жүргізді. Іс-шарамен жалпы саны 140 студент қамтылды.

Емтихан сессиясы қарсаңында клуб белсенділері білім алушыларға академиялық адалдық қағидаттарына арналған жадынамалар таратты. Материалдарда адал білім алудың негізгі құндылықтары – тапсырмаларды өз бетінше орындау, зияткерлік еңбекке құрметпен қарау, объективтілік және оқу қызметінің нәтижелері үшін жауапкершілік туралы ақпарат берілді.

Жадынамаларда академиялық адалдықты бұзу фактілеріне ерекше назар аударылды. Атап айтқанда, көшіру, плагиат жасау, емтихан кезінде рұқсат етілмеген материалдарды пайдалану, оқу нәтижелерін қолдан жасау және өзге де адал емес әрекеттер туралы түсіндірілді.

Мұндай іс-шараларды өткізу емтихан кезеңінде ерекше маңызды, өйткені әрбір студент білімді әділ әрі шынайы бағалаудың маңызын есте сақтауы тиіс. Академиялық адалдық қағидаттарын сақтау білім алушылардың оқуға деген жауапты көзқарасын қалыптастырып, кәсіби этиканың дамуына және жастар арасында сыбайлас жемқорлыққа қарсы мәдениетті нығайтуға ықпал етеді.

«Таза сессия: Сыбайлас жемқорлықсыз болашақ» акциясы адалдық, әділдік және жауапкершілік сияқты құндылықтарды өмірлік басты қағидаттар ретінде ұстанатын ұрпақты тәрбиелеуге бағытталған маңызды қадамдардың бірі болды.

Дайындаған оқытушы: Вдовиков А.А.