Біздің колледж түлектері Air Astana әуекомпаниясының өкілдерімен кездесіп, авиатехниктерді даярлау бағдарламасымен танысу мүмкіндігіне ие болды.

Спикерлер студенттерге бұл бағдарламаның артықшылықтары туралы айтып, оның арнайы жоғары білімді талап етпейтінін және EASA Part-66 халықаралық стандарты бойынша оқытатынын атап өтті. Бағдарламаны сәтті аяқтаған түлектер EASA Part-66 сертификаты мен лицензиясын алып, Қазақстанның жетекші әуекомпаниясында жұмыс істеу мүмкіндігіне ие болады.

Бағдарламаның негізгі артықшылықтары:

• толықтай компания есебінен қаржыландырылатын оқыту және Астанада тұру мүмкіндігі;
• кепілдендірілген жұмысқа орналасу (кіші механик қызметіне);
• ағылшын тілін үйрену мүмкіндігі;
• тұрақты жалақы және корпоративтік жеңілдіктер (медициналық сақтандыру, әуебилеттерге жеңілдіктер және т.б.);
• әуе кемелеріне техникалық қызмет көрсету саласында мансаптық өсу мүмкіндігі.

Оқыту кезеңдері:

• 1-ші жыл – Air Astana компаниясында кіші механик ретінде ресми түрде жұмысқа орналасу.
• 2-3-ші жылдар – теориялық оқыту және EASA Part-66 сертификатын алу.
• 4-5-ші жылдар – әуе кемелеріне техникалық қызмет көрсету тәжірибесі және EASA Part-66 халықаралық лицензиясын алу.

Бағдарламаға қатысу үшін талаптар:

• Қазақстан Республикасының азаматы болу;
• орта немесе орта-арнайы білімі болуы;
• Pre-Intermediate деңгейінде ағылшын тілін білу;
• физика мен математиканы жақсы меңгеру;
• 18 бен 21 жас аралығында болу.

Қатысуға өтінім қабылдау басталды! Өтінішті job.airastana.com сайтында толтыруға болады.

Бұл кездесу студенттеріміз үшін пайдалы әрі шабыттандыратын шара болды. Air Astana компаниясына құнды ақпарат пен қолдау көрсеткені үшін алғысымызды білдіреміз!