2025 жылғы 2 сәуірде Қостанай политехникалық жоғары колледжінің студенттері «Достық үйінде» өткен маңызды іс-шараға қатысты. Кездесу этномәдени орталықтың 30 жылдығына орай ұйымдастырылып, оны «Бирлик» Әзербайжан ассоциациясы қоғамдық бірлестігінің даму басқармасы мен Қостанай облысы әкімдігінің «Қоғамдық келісім» мекемесі бірлесе өткізді.

Іс-шараның мақсаты – жастар үшін ашық диалог алаңын құру, Қазақстан халықтарының этносаралық келісімі мен бірлігін нығайтудағы жастардың рөлін талқылау. Сондай-ақ, әзербайжан жастарын этномәдени орталықтың дамуына және одан әрі ынтымақтастыққа тарту маңызды аспектілердің бірі болды.

Кездесу барысында колледж студенттері орталықтың қызметімен танысып, түрлі этнос өкілдерімен пікір алмасып, жастардың мәдениаралық жобаларға қатысу мүмкіндіктерін талқылады. Жастар белсенділік танытып, этносаралық келісімді нығайтуға бағытталған өз ойлары мен ұсыныстарын білдірді.

Бұл іс-шара ұрпақтар арасындағы диалогты дамыту мен Қазақстанда тұратын халықтардың достығын нығайту жолындағы маңызды қадам болды. Студенттер өздеріне пайдалы тәжірибе жинап, осындай бастамаларға болашақта белсене қатысуға жігер алды.

Мускина Ж. Ж., педагог-ұйымдастырушы

  #Біртұтас_тәрбие